الواجـــــــــــــــــــب

من ايـمـا الغالية جائنى هذا الواجب مع طلب رقيق يصعب رفضه للإجابة عليه ... وحيث أن ايما تمثل ثلث جمهورى التدوينى فلا مجال لخسارة هذا الثلث بالهروب من الإجابة ــ بس ياريت نخلى موضوع الهروب دا سر!

على كل حال ومنعا للتهييس ــ بسبب قلة النوم ــ آثرت أن أضع هذه المقدمة على أن أعود للإجابة قريبا

الواجب :

الواجب من سؤال واحد ... اذكر ستة أسرار قد لا يكتشفها من يحدثك لأول مرة

السر الأول

كسول فى ما لا أقتنع به وشعلة نشاط فيما أؤمن أنى سانجح فيه ... أحب النظام جدا (مش نظام الحكم طبعا) لكنى فشلت كثيرا فى أن أكون منظما

السر الثانى

أعانى أزمة ثقة فى كل شيء تقريبا ... ربما لأنى تلقيت خبطات لذيذة (جدا)فى بداية حياتى ... لكن فى اللحظات التى أشعر فيها بقدرتى على الإنجاز أكون شخصا مختلفا

السر الثالث

خطى سيء ... رغم كونى مدرسا إلا أنى اعانى هذه المشكلة لكن بحمد الله أثبتت التجربة أن هذا لا شيء ... وتلاميذى العباقرة نجحوا فى قرائته لدهشتى الشديدة !! بل وتعلقوا بى كمدرس وهذه منة من الله أحمده عليها

السر الرابع

لدى قدر من اللامبالاة يفوق ما لدى الحكام العرب عند دخول الأمريكان أفغانستان والعراق ...اللامبالاة فى الأشياء التى لا أقتنع بها ... وأنا غير مقتنع بأشياء كثيرة بالمناسبة

السر الخامس

هى لازم الأسرار تكون حاجات وحشة بس؟ طيب ما علينا ... مشتت فى موضوع (مصر) دا ....مش عارف والله أحبها وللا أكرهها ...المشكلة إنى داخل أهو على 29 سنة ومشفتش غير رئيس واحد وسياسة واحدة لما قربت أكره نفسى ... قريت كتير جدا لدكتور نبيل لحد ما بقت مصر عندى مزدوجة ودى مشكلة رهيبة بلاش نخوض فيها ... ميحسهاش إلا إاللى بيعانى منها ... كفاية إنى يوم ما عرفت إن مصر دولة من دول العالم التالت إتصدمت !! الكلام دا كان من حوالى 15 سنة تقريبا ...دلوقتى طبعا أحنا من دول العالم العاشر... بس فى الآخر برضو أكيد مصر الوطن أكبر من كل التافهين اللى حكموها أو بيحكموها

السر السادس والأخير

حيث إننا خلصنا هقولكم نكتة ...عندما انشئت هذه المدونة أخذت أبحث لها عن أسم وتعبت من البحث وأحترت وفكرت أسميها عزيز الجبالى اللى هو اسمى فى منتدى دار ليلى وبعدين قلت ايه السخافة وضيق الأفق دا ... ما أنا ممكن أغير ...ولأن صورة الجبالى فى دماغى إنه مصرى حقيقى فرحت أخترت أسم عزيز المصرى ... لحد هنا تمام مفيش مشاكل ... وبعدين طبعا كنت فرحان بالمدونة رحت رايح على جوجول وكتبت الاسم بقى واستنيت ... لقيت صفحات كتيييييييييييير جدا فيها عزيز المصرى وقبل ما تاخدنى الجلالة واعيط وأنا فاكر إن جوجول بيحتفل بيا أكتشفت إن ... أحم ...إن عزيز المصرى دا واحد مهم جدا كان عايش فى النص الأول من القرن العشرين ومات بعد الثورة وإن أسمه الكامل الفريق عزيز باشا المصرى وإن الراجل دا كان مصيبة ...بلوة ... كارثة ...سموه أبو الثائرين ...وسيرة حياته متخمة جدا جدا ...اللى أنشأ كلية الشرطة (مدرسة البوليس)...وحارب مع الألمان ومسك قيادة حاجة كدا أسمها الجيش العربى المشترك وراح اليمن وعمل صلح هناك ورجع مصر وأتحكم عليه بالإعدام مرتين تقريبا وحاول يهرب مرتين منهم مرة بطيارة حربية لأ وكمان كان واحد من إتنين كانوا رواد للملك فاروق فى رحلة تدريبه فى لندن ...أنا أكيد قريت الأسم دا كتير قبل كدا بس بصراحة مكنتش بقف عنده كتير غير إنى فعلا كنت بنساه ...كانت مرة من المرات الكتير اللى بكتشف فيها إن ثقافتى محتاجة ترميم ويمكن تكون محتاجة تتهد وتتبنى من جديد ... بس المهم إنى قررت بعدها أسيب المدونة بنفس الأسم مع تعديل المعنى جوايا واهو برضو أبو الثائرين مطلوب دلوقتى

*******

طبعا الأسرار لم تنتهى ولا يمكن ان تنتهى ... الحمد لله الواجب إنتهى

المفترض أن أمرر الواجب لستة من المدونين لم يصلهم من قبل ... وهذه مشكلة كبيرة فعلا لأنى كسول فى حركتى التدوينية وبالتالى فمن أعرفهم قليلون للغاية ... فضلا عن ان التاج قد وصلهم من آخرين ...

حسنا

نؤجل هذه الخطوة حتى نجد من نلقى عليه التهمة

وألف ألف شكر يا ايما